Masfjorden sokn har no inngått avtale med Kirkeorgel Strandskogen om leveranse av nytt orgel.
Orgelet er eit digitalt orgel av merket Johannus, og modellen heiter Ecclesia T-250. Biletet over syner ein slik modell, men i ein litt mørkare farge enn det vi vil få.
Som ein vil sjå, er dette ein mindre modell enn orgelet som til no har stått i Frøyset kyrkje. Men det er dimensjonert for kyrkjer av Frøyset kyrkje sin storleik, og skulle med sine 34 stemmer som kvar kan setjast opp i fire ulike stilar stette dei krava ein måtte ha til eit orgel i Frøyset kyrkje, både som liturgisk instrument og til konsertoppgåver.
Parallelt med at orgelet vert bygd i Nederland, vert det arbeidd med å utforme ei høveleg løysing for høgttalarane. Og når orgel og høgttalarar vel er på plass, vert alt montert og tilpassa akustikken i kyrkja.
Det er i dag uråd å seie nøyaktig kva tid orgelet vil stå ferdig til bruk. Men med mindre tilhøve ein ikkje har kontroll over - koronasituasjonen, til dømes - fører med seg forseinkingar i arbeidet, er det grunn til å tru at orgelet er teke i bruk til påske.
Foto : Johannus
Tekst : Rune Garmann