I 2024 var det over 40% fleire som var på gudsteneste enn året før. Og det er fleire gode tal i den ferske årsstatistikken til Masfjorden sokn.
Ved starten av året er det tid for å sjå tilbake på året som har gått, og samtidig ser vi framover mot det nye som ligg framfor. Frå kyrkjestatistikken for 2024 kan det rapporterast om svært gledelege tal. Spesielt stor var auka i talet på kor mange som møtte til gudstenester i Masfjorden i 2024, heile 3339 personar mot 2350 året før. Det er ein solid auke på tett opp mot 1000 fleire gudstenestedeltakarar. Naturlege variasjonar på kor mange som vert fødde, døypte og konfirmerte, spelar sjølvsagt inn, men den prosentvise oppslutninga er stabil og svært god. Det var nokre fleire gudstenester enn året før, men uansett er framgangen gledeleg stor. Snittet per gudsteneste, inkludert gudstenester på sjukeheimen, friluftsgudstenester m.m. auka frå 46 til 57, og vi må slå fast at det har vorte meir vanleg å gå til gudsteneste i Masfjorden.
Tendensen er også den same fleire andre stader. Oppmøtet i kyrkja på julaftan var i 2024 større enn i 2023 i alle sokna i Nordhordland. Lokalavisa skreiv om ei overraskande auke.
– Det er meir urolege tider og det er fint å kjenne på det som kanskje er nært og trygt, og sånn er det i kyrkja, sa prost Helge Taranrød til avisa Strilen 17. januar.
Supersøndag
Ein ganske vanleg søndag i oktober fann til saman over 300 menneske vegen til gudsteneste. Då var det nemleg Supersøndag med gudstenester i Solheim, Frøyset og Sandnes kyrkjer med utdeling av kyrkjebøker, dåp og barnekorsong. Supersøndag er det nye namnet på enkelte søndagar der det gjerne er trusopplæringstiltak eller fleire gudstenester med barn og unge i sentrum. Dette har vist seg å bli teke godt imot av mange.
Som prest er det fint å vera ein del av ein flokk med engasjerte medarbeidarar, både tilsette, rådsmedlemmer, andre som bidrar for å kunna gje innbyggjarane eit så godt tilbod som mogleg.
På dei meir ordinære gudstenestene og i ferietid kan talet på frammøte vera nokså låge, også dette året. Av den grunn har det også vore satsa på alternative samlingar som til dømes songkveldar og nokre gudstenester med spesielt fokus. Johnny Cash-messa i haust var også ei av dei godt besøkte gudsteneste. Og du, det er plass til deg - både dei heilt vanlege søndagane, ved høgtid og glede og i sorg.
Gudstenestelivet er langt frå det einaste som skjer i kyrkja. I løpet av året som har gått var det også starta opp att med småbarnstrall og eit nystarta barnekor som er i vekst.
Tekst: Torbjørn Sæle, sokneprest
Foto av 4-åringar som får bok på Supersøndag i Sandnes kyrkje: Lillian Andvik.
Foto av barnekoret i Sandnes kyrkje: Alf Helland.