Fjon fjellkyrkje og ungdomssenter

Tysdag 28. mai 2024 vart foreininga Fjon fjellkyrkje og ungdomssenter skipa med utsendingar frå alle kyrkjesokna i Nordhordland til stades i fjellkyrkja i Matredal i Masfjorden. I praksis held drifta fram som før, og nye og gamle brukarar vert oppmoda til å nytta og støtta fjellkyrkja.

Masfjorden sokn er framleis eigar av fjellkyrkja, medan drifta vert leia av foreininga sitt styre med Anne Kristin Rafoss som vald leiar. Fjellkyrkja har ingen tilsette og vert drifta på dugnad. Styret har i fleire år leia arbeidet fram mot skipinga av foreininga, og eit godt og grundig arbeid leia an av tidlegare sokneprest Knut Fredrik Sørheim, har no resultert i organisasjonsforma foreining.

Fjellkyrkja har sidan vigslinga i 1987 vore nytta til gudstenester, leirar og andre samlingar som stabsturar, sommaravslutningar, styremøte, konfirmasjonsfestar, bursdagar, jubileum og filminnspeling m.m.  Den siste tida har også fleire oppdaga Fjon som ein god plass å samla storfamilien eller nokre venefamiliar i lag. For bruk i helgene kan det vera lurt å bestilla i god tid.

Du kan vera med å støtta Fjon fjellkyrkje og ungdomssenter ved å

• bruka fjellkyrkja
• tipsa andre om å bruka fjellkyrkja
• delta på dugnad, olsokfeiring og andre arrangement
• be for arbeidet, staden og styret

Oppussing av dusjar

Sommaren 2024 vart det gjort eit stort arbeid for å oppgradere dusjavdelinga. Den eine avdelinga er no delt inn i tre separate dusjrom. Planen er at også den andre avdelinga skal følgje etter, men det er kostbart arbeid som treng finansiering.

Gåver

Fjellkyrkja er svært takksam alle gåver frå kyrkjelyder, enkelpersonar, lag og næringsliv. Foreininga er Brønnøysundregistrert med organisasjonsnummer 912596176, Vippsnummer 945857 og kontonummer 3626 58 68953. Det er også blitt mogleg å støtta foreninga med Grasrotandelen til Norsk Tipping.

Dugnad

Ein annan måte å bidra på er ved dugnadsarbeid, som vask, maling og vedlikehald, både ute inne. Nokre dagar/helger samlast fleire for større dugnadsarbeid. Ta kontakt med Arve Husa, mobil 48 09 57 30 om du kan ha høve til å ta i eit tak.

Meir info

Meir om fjellkyrkja, bookingkalender m.m. finn de på nettsida www.fjonfjellkyrkje.no

Følg gjerne også «Fjon fjellkyrkje» på Facebook.

Tekst og foto: Torbjørn Sæle